Lyrics:

A Pasturella

(Traditionnel)





Nantu a riva di u mare ci era una pasturella
Chì curava e so capre in l’arba tennerella.

Sortì un lupu da u boscu incù una bocca grande è nera
Si pigliò a più bella capra chì a pastora avia.

A pastora si messe à pienghje è pienghjia forte forte
Pienghjia a so più bella capra chì era andata à more.

Passò un giovanu cavalieru incù una spada longa è nuda
Chì minò in ventre à u lupu è a capra sortì fora.

Tenite a vostra capra è mettitela in lu brancu
V’aghju fattu un bel piacè fatemine un altru.

Cosa vulete ch’eo vi dia sò una povera pasturella
Pigliatevi issa capra rossa vi ne facciu rigalu.

Eo ùn sò micca marcante nè di stofa nè di lana
Vuleria piuttostu un basgiu di a vostra propria bocca.

Zittate o sgiò cavalieru è chì nisunu vi senti
Aghju sempre u mo maritu è ùn vogliu firma senza.

Dilusu u sgiò cavalieru si n’andò senza russore
In cerca di qualchì pasturella disposta à fà l’amore.