Lyrics:

Andendu in trenu

Traditionnel




Permettite o Damicella ch’eo incendi una zigaretta
À voi lucente stella gran furtuna vi s’aspetta
Sia pronta a purcella quandu hè pronta a funicella.

Ùn hè quessu lu m’affannu ùn simu ancu di Natale
Avemu i prisutti d’annu chì era un bellu maiale
Ma scusate ùn vi cunnoscu site di pianu o di boscu ?

Eo sò di a Castagniccia a mo vita hè un gran misteru
Cù e donne ùn ebbi liccia ma quantunque oghje speru
Chì sì da voi sò graditu seraghju u vostru maritu.

Ma cosa vulete fà cù a vostra pelle guizza
S’è vo venite à cascà, ma quale più chì v’arrizza
Gudite a vostra pace, ùn circate il can chì ghjace.

Andate o Madamicella nulla vi farà difettu
Averete tuttu o bella, tuttu, tuttu a vi prumettu
Sempre mi possu dispone ben ch’ùn sia più pullastrone.

Ùn vi ne site ancu avvistu ch’ùn site più pullastrone
Ùn pudete più stà arrittu s’è vo ùn avete bastone
È s’eo fussi ùn ci hè penseru prestu metterebbi u neru.

Di mè più nun vi ridite, aiò femula finita
A u mo core rispundite per fà finisce sta lita
S’è vo ùn avete risposta mi la derete per posta.

A risposta o ziu vechju quandu ghjunghjimu in Bastia
Andate à cumpravvi un spechju per guarì sta malatia
Allora ci leghjerete chì più giovanu nun siete.