Lyrics:

U Zappone

Auteur : Ghjacumantone Mariani Musique : Carlu Rocchi







Sempre mamma mi dicia
Ch’ùn valia un sprichju d’agliu
Canta è sona à l’osteria,
Senza fà nisun travagliu
O mamma avite ragione
Cumprà mi vogliu un zappone.

Subitu feci la spesa
D’un zappone assai gentile
È in una simana intera
Li feci un famosu stile
Di cultella è senza piola
Li feci un stile à cugnola.

È po mi messi à lavoru
Nentru à lu mio giardinu
Posi una sporta di pomi
È n’arricolsi un bacinu
Travagliai tuttu l’inguernu
Fubbenu fatiche indarnu.

L’annu dopu era nuvale
È lu suminai à granu
Ne feci un bellu stifale
In paese di Sermanu
Ci ne messi un decalitru
N’ebbi quant’eo n’aghju in manu.