Lyrics:

Camina o desertu

Camina la nuttata per sta voce d’induvina
Si cerca è s’alluntana quella noce zittellina
Pensu à l’altura d’una vita
Ch’un c’hè primura chi s’hè sciolta
Lume di fiore è di rivolta
Pasciu u to core
Parlendu à tè
Figliola di dumane

Cunnoscu for’ di brama d’abbandonu di straziera
D’avè persu a fiamma di discore è di fà fiera
Stonda di focu è di penseru
Lu mio sicretu più sinceru
Alluntanendu stu desertu
Ti vogliu beie
Cantendu a té
Giardinu di e fonte

Rumenzule di farru è di sugettu incansiatu
Viaghju à scappa scappa alluntanendu u to campatu
Mare d’annoiu è gran’ turmentu
À cerca soldu ùn c’hè chè pientu
Ch’ellu si move stu lamentu
À rinvivisce
Fiara di ghjente
Ch’ùn simu ‘niputente

Passava ogni matina à fà la so canzone nova
Zitella à lu mio core sì diventata mascarola
Oghje tù balli à mille stelle
Scontri lu mondu è le so pelle
Soni di mille cialamelle
Inturbidisce
Un negru fume
Sangue di lu mio sangue

Sale ventu è gran’ desertu
Chì ferisce l’universu
Macimpiatu è traversu
Fermi mortu sacramentu