Lyrics:

SERENATU DI SCAPPINU

O spechju d’e zitelle di la pieve,
O la mio chjara stella matuttina,
Più bianca di lu brocciu è di la neve,
Più rossa d’una rosa damaschina,
Più aspra d’a cipolla è d’u stuppone,
Più dura d’una teppa, è d’un pentone.

Tù m’ai strigatu : eo strughju à pocu à pocu.
Sò spitittatu, è à u core aghju gran pena.
A notte ùn dormu, è aghju u sangue in focu
Cum’è manghjà si a pivarone à cena ;
Lasciu andà le moi sgiotte à gueru intornu,
E ùn tessu mancu trè fattoghje à u ghjornu.

Duve fai trischie u sabatu pè u fornu
Eo vengu in nice di circà u vitellu ;
Ti facciu u chjerchju, è ti vò sempre attornu,
Cum’è lu to agnellettu è cagnulellu.
Ami tant’u to cuchju è u to mertinu,
E po tant’odiu porti à mè mischinu.

S’è in chjerciula dai cena à u mannerinu
A sera, cogli in l’ortu l’insalata,
T’appostu, è tù mai nùn mi voli vicinu.
E puru eo t’amu, è t’aghju sempre amata,
Fin da quandu era tantu chjuculellu
Ch’ùn m’arrivava à coglie à u summerellu.

Lasciava scumbià l’echje e l’agnelle,
Cullava à coglie e frutte sù i chjarasgi,
Cù tecu e mi ghjucava à e piastrelle,
E guagnendu vulia l’impatta in basgi.
D’u morsu, chì per zerga à lu pughjale
Tù m’attaccasti, aghju ancu u marcu avale.

Un ghjornu, ch’era in tempu di sighere
E d’orzu novu si facia lu pane,
Tù cantavi a diana ; eo cun piacere
Sottu un sepalu stava ad ascultàne
All’impruvisu mi venne la tossa
Eo dissi : Lisca ! è tù ti festi rossa.



Ti ricordi in quest’ultima nivata ?
Tiravi e tolle, è à u to balcon supranu
Facie tra mezu à l’albe l’affaccata.
Eo facia a bocca-risa un basciamanu.
Quelle sere eo venia da tè à veghjà ne,
E ghjiucavamu inseme à scallamane.

Vengu spessu cù a cetera à u to fucone,
Mi arrembu à tè ne, è allor sò tuttu in vena,
E sonu è cantu strunelli è canzone ;
Mi scordu di lu sonnu è di la cena ;
U troppu, duv’eo stò, mi par di piume,
E ùn mi curu d’accecà di fume.

Ti dedi u core, o Filignocca ingrata
E tuttu u meo ti sarie prontu à dà ne.
U casgiu, cù a moi vacca bracanata
Mi face ogni jornu, eo lu vendu in cità ne
E à l’appiattu di mamma è d’e surelle
Ti ne accattu frisgetti, achi, è curdelle.

T’aghju datu una reta crimisina
Cun quattru pendalucchi, infrisgiulata,
Un casacchinu à frange di stamina ;
Quandu lu porti pari una spusata.
In ghjesgia la dumenica da mane
Sì l’inviglia di tutte e paisane.

Vulinteri lascerie d’esse Scappinu,
Per esse u casacchin ch’eo ti dunai
E stringhje lu to senu alabastrinu ;
E or chì durmendu in lettu ti ne stai,
Oh fussi u cavizzale, o u cuscinettu,
O u lenzolu supranu du to lettu !