Lyrics:

MAGANZIA

Mezzanott’hè di caminu
U mio core si trasanda
A l’allettu citatinu
Chi u carrughju mi manda

Bramu di brusgià mi l’ale
Puntu un usciu di gargotta
Ch’in la tanna di u male
Mi chjam’una voce rotta

Voca pè l’onda turchina
D’un fume à taglià à fette
A frebba di l’istatina
Chi balla à vite offerte

Sì quì, Fiore di catramu
E n’ai tesu la reta
Digià pigli la mio manu
Stà sera sò la to preta

Saitteghja li mio sensi
Lu to garbu animale
U salvàticu l’amansi
Di resiste qui nun vale

Macantuleghji e notte
Di l’omi di scarapiccia
Sai leghje a so sorte
Furtun’o gattiva liccia

Tutti tù l’ai dumati
Di a cità li stiletti
Tutti si sò cunsumati
Ma tù nunda nun rispetti

Per furtuna o li mio guai
M’ai prupostu l’alloghju
Mi sò dettu : oramai
Scappu o mi ci missoghju !