Or chì l’averaghju fattu A lu Corsu cusì ingratu Chì m’hà fattu la sintenza E à morte cundamnatu Senza sente testimoni Nè cunsultà lu ghjuratu.
M’hà dichjaratu le guerra Cum’è à un veru malfattore ; M’hà messu li sbirri appressu Chì m’attaccanu terrore O Corsu rifletti un pocu Versi mè sì senza core.
M’ai chjappu à l’arma bianca Tù per esse più sicuru Quandu improntu li mio fiori Quandu lu fruttu hè sicuru Un mi porti alcun rispettu O Corsu, si cusì duru !
Quandu la guerra hè finita Chì sarà di tè mischinu ? Zappa puru lu to fornu E chjodi lu to mulinu : Parterai lu mondu Errente senza un quattrinu
Sempre cù li stracci à collu Passerai piani è muntagne : Camperai à erbiglie crude Racolte in le campagne Perchè vindetta dumanda L’alberu di le castagne
La to cumpagna di strada Sarà sempre Mamma piera Per tuttu la truverai Sempre ti sarà sincera Ti farà la so scorta Corsu, lu portabandera.