Lyrics:

Zwesche Rotterdam un Basel, sick Johrzehnte
Stromaufwärts un leer retour.
Die Krüzze ’n Zahle ahm Ufer kennt e’,
Bruuch kein Landkaat mieh un och kein Uhr.
Ahm Bug steht „Sisyphos“, er weiß ni’ mieh, wieso,
Dat Scheff heeß immer su.

„Suwiesu, wat all vorbei ess, weiß ich suwiesu.
Obwohl, wat heiß he ‚Suwiesu’?
Mer weed doch dräume dürfe aff un zo.“

Er ’ss op däm Kahn he opjewaaße un e’ weiß noch,
Wie e’ stolz ahm Ruder stund.
Papa leet en he un do ens lenke, weiß sujar noch
Dat Jeföhl op singem Ärm un wie e’ roch.
Un dann die Johre met Johanna un däm Klein,
Doch irj’ndwann jing die och.

„Suwiesu, wat all vorbei ess, weiß ich suwiesu.
Obwohl, wat heiß he ‚Suwiesu’?
Mer weed doch dräume dürfe aff un zo.
Suwiesu: Wer dräump, ess lang noch keine Idiot.
Klar, mer verläuf sich he un do,
Doch wer nie dräump, ess schon lebendig duut.“

Medden om Fluss ess et janz still,
Dä Kurs zo hahle ’ss alles, wat e’ will,
Nur die Maschin,
Die sich stromaufwärts quält,
Durch et Wasser wöhlt.
Un deef enn ihm, do ess en Stemm, die brüllt:

„Suwiesu, wat all vorbei ess, weiß ich suwiesu.
Obwohl, wat heiß he ‚Suwiesu’?
Mer weed doch dräume dürfe aff un zo.
Suwiesu: Wer dräump, ess lang noch keine Idiot.
Klar, mer verläuf sich he un do,
Doch wer nie dräump, ess schon lebendig duut.
Wer niemohls dräump, ess schon lebendig duut.“

Zwesche Rotterdam un Basel, schwerbelade
Stromaufwärts un leer retour.