Lyrics:

Dä Pappkarton, bovve em Rejal, sick Johre unberührt, verstöbb.
Eez woor do Majarin drinn, dann en Ihsebahn. Immer noch steht „Rama“ dropp.
Ohne Leider kütt do keiner draan, jedenfalls ess et nit leich,
unfallfrei die Kess eraffzeholle, weil se links ennjerisse ess.

Fotos met jewelltem Rand un jenachdämm, affjeknick, verjilb, verblasst.
Hillije Ohvend, Camping, Karneval, Heinz un ich om Chlodwigplatz.
Bapp un Mamm, Foxtrott weed jedanz, Käthi, Annelie met Zöpp,
Tante Netta kannt ich nur enn schwazz, Poller Wiss un Sev'rinsbröck.

He dat Leed ess für ming Ahne, minge Stamm, kölsche Seele allesamp.
Für ming Lück, für ming Vertraute, blootsverwandt, ming Familisch, minge Clan.
Mir sinn reinrassije Strooßekööter un Südstadt-Adel suwiesu.
Un och wenn et keiner ussprich, insjeheim steht fest, dat Bloot decker als Wasser ess.

He, dä Platze Manes ahn der Thek un sing schöne Schaffnerin.
Jrooße Liebe, fünf Pänz hatten die. Ich selvs braat et nur op vier.
Unser Nest ess mittlerweile miehstens leer, Kinder finge ihre Wäasch.
Losszelosse feel ahm Anfang ziemlich schwer. Em Losslohße simmer schlääsch.