Lyrics:

Deshalv spill mer he

Hey, du do un du, wann ess et he su wigg,
Dat mer de Muhl opmaache darf, wemmer jet saare will?
Weed höchste Zick,
Dat die Versteckspill-Rejel ni’ mieh intressiere,
’T weiß jeder längs, wat üch un uns bedroht,
Un wer’t noch nit weiß, soll et endlich hühre, dat woll mer fiere – jrenzenlos.

Kütt ruhig nöher un hührt zo,
Die drei Strophe he sinn janz speziell für üch.
Woröm mer he sinn, ess womöglich nit janz kloor,
Su wie’t och secher ess, dat ei Leed nit jenüsch,
Öm all die Vorurteile affzebaue, die sick drissich Johr
Vun Kahle Kreejer huhjeschäzz enn Ost un West,
Weil ’t ess schön simpel, wenn och jrausam, wemmer alles wie bessher
Enn e’ Schwazz-Wieß- un Gut-un-Böse-Schema presst.
Wie off schon hann se üch un uns domet beloore,
Die Angs jeschürt enn Bundeswehr un Volksarmee,
Uns, wo’t nur jing, öm jed Jemeinsamkeit bedroore?
Domet dat ahnfängk opzehühre, spill’ mer he.

Hey, du do un du, wann ess et he su wigg,
Dat mer de Muhl opmaache darf, wemmer jet saare will?
Weed höchste Zick,
Dat die Versteckspill-Rejel ni’ mieh intressiere,
’T weiß jeder längs, wat üch un uns bedroht,
Un wer’t noch nit weiß, soll et endlich hühre, dat woll mer fiere – jrenzenlos.

Wo mir herkumme, weed et kälder Daach für Daach,
’T sinn Pharisäer, die sich „Christe“ nenne, draan,
Doch wer sich wie nennt, ess bekanntlich jo su ’n Saach,
Loss uns nur Minsche sinn, ob Frau, ob Kind, ob Mann.
Mer spille he, öm üch ze treffe, selvs ze spüre, wat he loss ess,
Hann uns eijene un kein jespaldne Zung,
Sinn nit op Beifall uss dä falsche Eck scharf, nä, mer wolle bloß
Beim Klartext blieve, ohne jed Beschönijung.
Mer sinn jespannt op jede Schwester, jede Brooder
Vum Erzjebirge huh bess zur Ostsee,
Vun Eisenach bess Frankfurt ahn der Oder,
Mir freun uns wie beklopp un deshalv spill mer he.

Hey, du do un du, wann ess et he su wigg,
Dat mer de Muhl opmaache darf, wemmer jet saare will?
Weed höchste Zick,
Dat die Versteckspill-Rejel ni’ mieh intressiere,
’T weiß jeder längs, wat üch un uns bedroht,
Un wer’t noch nit weiß, soll et endlich hühre, dat woll mer fiere – jrenzenlos.

Un noch jet, falls et nit schon ohnehin bekannt,
Dat ahn die Clique, die sich „Volksvertreter“ nennt:
Uns kritt ihr vüür kein offizielle Kaar jespannt,
He, wo jet andres unger unsre Näjel brennt.
Denn mir hann Fründe he, die hann kein wieße Duuv op blauem Jrund,
Die hann ’ne Schmied, dä määt e’ Schwert jraad zo ’nem Plooch,
En SS 20 zo ’nem Traktor un en Pershing zo ’ner Lok,
Die hann vum Rüstungsschwachsinn su wie mir jenooch.
’T sinn Pazifiste ohne Wenn und Aber,
Ohne Hingerdüür, die saare: „Nä!“,
Die hann wie mir die Naas voll vun däm janze Laber –
Janz besonders für uns Fründe spill’ mer he.

Hey, du do un du, wann ess et he su wigg,
Dat mer de Muhl opmaache darf, wemmer jet saare will?
Weed höchste Zick,
Dat die Versteckspill-Rejel ni’ mieh intressiere,
’T weiß jeder längs, wat üch un uns bedroht,
Un wer’t noch nit weiß, soll et endlich hühre, dat woll mer fiere – jrenzenlos.