Lyrics:

Zofall un e janz klei‘ bessje Jlöck

’Ne Zofall bloß, dat et jraad he die Stadt wohr,
Jraad he dä Park, dä noh Holunder roch,
Met welke Ruuse, nur noch Jestrüpp met Dorne,
Un doch vertraut, neu wohr hück bloß ihr „Doch“.
Suvill wie „Basta“, e’ kennt dä Punkt, wo Schluss ess,
Definitiv: Jesprengk wohr jede Bröck.
Hä ring noh Luff: „Wievill noch vun dä Tiefschlääsch?“,
Un wirf et Handdooch – „Wohr wohl nix met Jlöck?!“

Dann ahm Kanal entlang un keiner säät jet,
Total verwirrt, en Leuchtschriff: „Zimmer frei“.
’T wohr ihr Hotel, su ’n buud wie sick Johre,
Dann noch en Naach, die wie ’ne stumme Schrei.
E’ Saxophon, fröhmorjens vun jottweißwo,
Hä fingk dä Breef: „... hann’t immerhin versöök.“
Enn däm Moment jeht sie durch die Arkade,
Postskriptum steht do noch: „Ich wünsch dir trotzdem Jlöck.“

„Drieh bloß nit durch“, befiehlt e’ sich, „op keine Fall, Mann!“
Hä kennt dä Trick, dä enn der Rejel funktioniert:
“Einfach su dunn, als wöhr dir alles drissejal, Mann,
Als wöhr sie’t Letzte, wat dich jemohls intressiert.“
’Ne blinde Bettler op ’nem Schachbrett hällt der Hoot hin,
En Handvoll Kleinjeld hätt se övvrisch, wirf et rinn.
Dä Ahl nick dankend un zällt noh, ob et jenooch ess,
„Wohl nur ’ne Zofall“, säät e’, luhrt ihr noh un grins.

Bei ihm em Zemmer em Hotel, do tick en Uhr bloß,
He musse russ, verfluch nochmohl, doch wohin nur?
Hä irrt nohm Hafen raff, he wohr die Auswahl nie jrooß,
Och wenn’t heiß, dat he Matrose Changse hann.
Ihm ess ejal, aff wo en Sehnsucht zo ’ner Sünd weed,
„Die kriej ’sch widder“, schwört e’ sich, „die kriej ’sch zoröck,
Weil mir sinn Zwillinge, mir zwei, wat nie vorbeijeht,
’Sch bruuch nur ’ne Zofall un e’ janz klei bessje Jlöck, Mann!“