Lyrics:

Letz bei ’nem Auftritt wood mer Foljendes kloor:
„Du muss ens e’ neu Leed schrieve, Jung, weil et ess bahl ald ni’ mieh wohr,
Dat du e’ Leed jebraat häss, dat bislang noch keiner kannt,
Denn jraad ein aufgeklärtes Publikum will aff un zo jet Neues hann.“

Okay, dä Auftritt ess jeloofe – kurze Rede, langer Sinn.
Ich will jetz nit verzälle wie, weil dat absolut nix bringk
Un usserdäm dat Leed dann widder vill ze lang weed – un dann schängk ming
Weil die Pressung vun dä Plaat weed dann ze eng. [PLattenfirma,

Och die Message jing dann flöte, keiner nöhm mer mieh jet aff,
Dat wöhr’t vorzeitije Aus für mich un für die janze Firma BAP.
Die Ökos leeten uns dann hänge un dat fänd ich fürchterlich,
Weil ich dann ussjeschessen hätt als „Alternativ-Millowitsch“.

Ahm nähxte Morje, ming Partie wohr kaum uss der Düür eruss,
Se fuhr ihr Mamm besööke, weil mer su jet aff un zo ens muss.
enn punkto Wäschmaschin ess unsre Haushalt nämlich nit autark
Un usserdäm: Eimohl em Mohnd finge mir Jrooßfamilien stark.

En Fläsch Retsina op der Köchendesch, die sibbefuffzich koss,
Die bringk mir’t inspirierende Feeling, su wie andre „Irish Moos“,
Paar „Mohrenköpp“ – ich hoff, dat weed mir nit rassistisch ussjelaat, denn en
Tranchierter Form weed jed Woot vun mir neuerdings op de Joldwooch dropjelaat.

’Ne Chauvinist ess nämlich der, der övver Chauviniste singk,
Schon enn der Bibel ess der schuldig, der die schlääschte Nachricht bringk.
Ich schlaare vüür: Övver dä Chaplin weed aff jetz ni’ mieh jelaach,
Dä hätt sich als Hitlerpersiflage nämlich selvs dä janze Wahnsinn övverlaat.

Suvill ahm Rande. Jedenfalls, ich sooß ahn mingem Köchendesch,
Ming Utensilien praatjelaat, schön akkurat, schön ödentlich.
E’ Thema hatt ich noch keins, do draan wohr ich och noch nit intressiert,
Nur eins wohr jetz ald kloor: Dat Leed weed op Umweltpapier komponiert!

Su hing ich röm un wohr dat Bleisteffeng verjeistigt platt ahm Käue,
Do jing die Klingel, ich maach op, dä Schäng kütt rinn un frööt: „Wat läuf he?
Aha, ahm Rocken besste un Retsina drinke deißte och,
Doch meinste wirklich, Jung, su ’n Literfläsch wöhr für uns zwei jenooch?“

Ich saare: „Drink doch eine met un setz dich hin un halt die Schnüss“,
Denn ich kunnt jo nit vill saare, weil dä Schäng su selden kütt.
En Idee vun ’ner Idee kohm, doch do jing et Telefon, ich jonn draan,
Do säät ’ne Typ mir, dat sich Rocken nur „Im Dienst der Sache“ lohnt.

Hä säät, hä wöhr dä Kaderleiter der „Subverso-Teil-Fraktion“,
Un zwar vum kämpferischsten Flügel: „Aufbauorganisation“.
Hä brööt e’ Leed für dä Parteitag, die Pointe hätt e’ schon:
„Weg mit den Splittergruppen – Vorwärts mit der STFAO!“

Ich saach: „Ens luhre, Meister, ’sch roof zoröck“, un häng dä Hörer en,
Jonn noh däm Schäng zoröck, dä trick sich jraad dä Ress Retsina rinn
Un meint: „Mann, schriev ens jet, wo mer sich kein Jedanke maache muss,
Wo mer die Power musikalisch spürt, em Maaren – un dann Schluss!“

Ich setz mich hin, nemm mir ming Jittar, spill ’ne mollije Akkord,
Do kütt dä Hüseyin vun bovven un säät: „Nix Arbeit heut bei Ford!
Du feiern mit Kollege, ische kaufen Bier un trinken mit!“
Jesaat, jetan – die Köch wood voll, denn hä braat Frau un Pänz treck met.

Des Meddaachs kütt dann noch ming Tant, die hatt wie Hüseyin hück frei,
Dä Schmal luhrt noh ’nem Klassentreffen met paar Kumpels noch vorbei.
Als schon om Desch jedanz wood – Steinzeit-Hits, ihr wesst schon, ultralaut...
Ich soll mich och noch verlob hann met irj’ndner putativen Braut.

Wat zweschendurch sich noch jedonn hätt, ess mir ni’ mieh völlig kloor.
Jetz fällt mir en, dat do noch jet met ’nem „Praline“-Abo wohr.
Dä Schmal meint, ich hätt ungerschrivve ’n zwar uss Solidarität
Met minger Tant, weil dä Hausierer die ahn dä Freddy Quinn erinnre däät.

Em Lauf des Abends wood dat Leed su nevvebei noch komponiert,
Als kollektiver Kreativitätsbeweis manifestiert.
’Ne Text, dä jeder joot fingk, jeder schnallt un nit nur su deit,
Un dä jeht: „Humba, humba, humba – Täterätätätätä!“

Un dä jeht:
„Humba, Humba, Humba – Täterätätä!
Humba, Humba, Humba, Täterätätä!
Humba, Humba, Humba, Täterätätä!”

Un dä jeht:
„Humba!
Humba!
Humba!“