Lyrics:

Da steh ma jetzt am Stammersdorfer Friedhof
Regnen tuat's, die Fiaß tamma scho weh
Der Pfarrer sagt, sie war a so a herzensguter Mensch
Und trotzdem foit ma's Waana hoid so schwer
Die Omama, die Oma ist nicht mehr

Wiari klaa war, hat's ma einegstopft die Knedln
Hat's glauert, mit dem Pracker in der Hand
Hat's mir ah umdraht schon den Magen
Es war ihr wurscht, sie hat mi gschlagen
Solang, dass i scho angfangt hab zum Beten
Lieb Jesukind, lass d'Oma doch verrecken

Die sieben Raben, es warn nur sechs
Die guade Fee, es war a Hex
Der böse Wolf, a klaaner Dackel
Der Märchenprinz, a schiacher Lackel

In Stammersdorf hat s'ghabt, die klaane Wohnung
Mit Spitzendeckerln und an Hitlerbüd
A Glasl Grammelschmalz am Fensterbrett
Den Nachtscherbn unterm Doppelbett
So weiß, so dick, so rund nd immer voll
Vielleicht hätt ma'n in's Grab dazualegn solln

Amoi hab i s'gfragt: „Wo ist der Opa?“
Im Himmel auf an Wolkerl spüüt er Geign
Für Führer, Volk und Vaterland erschossen
Aufghängt und verbrannt
Auch das hat sie dem Adolf stets verzieh'n
Er hat ihr ja das Mutterkreuz verlieh'n

Die sieben Raben, es warn nur sechs
Die guade Fee, es war a Hex
Der böse Wolf, a klaaner Dackel
Der Märchenprinz, a schiacher Lackel

In letzter Zeit da war s' scho a bisserl komisch
Des Grammelschmalz is gstanden unterm Bett
Die Spitzendeckerln hat s'verbrannt
Den Hitler hat s'an Pülcher gnannt
Den Nachtscherbn hat s'plaziert am Fensterbrett
Ganz Stammersdorf hat über sie schon gredt

Am Muttertag da hamma s'gführt in Prater
Die Oide war auf amoi wieder jung
Beim Go-Kart-Fahrn hat s'gjodelt
A paar Langos hat s' verdruckt
Nur beim Sturmbootfahrn
Da geschah ein Missgeschick
Da is s'an ihre foischen Zähnt derstickt

Die sieben Raben, es warn nur sechs
Die guade Fee, glaubt's ma's, des war a Hex
Der böse Wolf, a klaaner Dackel
Der Märchenprinz, a schiacher Lackel

Oma, pfiatigott, mach's drüben besser
Mach kaane Knödeln für die Engerln, sei so gut
Tua net de Heiligen sekkiern
Tua net den Opa denunziern
Und gehst zum Herrgott auf Besuch, a guter Tipp
Omama, nimm's Mutterkreuz net mit